Miljø- og utviklingsminister Erik Solheim er den fyrste norske politikaren som besøkjer Sudan etter den vellykka folkerøystinga om Sør-Sudans framtid i januar i år.
Solheim deltek på ein seremoni i Juba der resultata av folkerøystinga blir offentleggjort. Folkerøystinga er den viktigaste milepælen i den sudanske fredsavtalen frå 2005. Noreg var ein av fødselshjelparane for avtalen, og er framleis ein viktig støttespelar til fredsprosessen. Avtalen kom i stand etter over 20 år med borgarkrig.
Solheim vil òg ha samtaler med dei viktigaste politikarane både i Juba og Khartoum om vegen vidare etter folkerøystinga og Noregs rolle.
Sudan er det landet i Afrika som mottek mest bistand frå Noreg. I 2009 brukte Noreg 578 millionar kroner på bistand til Sudan.